NATIONAL– Iginpapabasura han kampo ni anay Presidente Rodrigo Duterte an kaso hine ngan ginhangyo an dayun nga pagpapagawas ha anay presidente mahitungod ha kapakyas han prosekusyon han International Criminal Court (ICC) nga maglunsar hin imbestigasyon ha gin aakusaran han crimes against humanity ha gintudlok nga “time-period”.
Nakasurat gihapon nga an prosekusyon an kinahanglan nga sumalo han responsibilidad para ha “miscalculated”, dire napapanahon, ngan sayop nga dedisyon nga dire magdumara hin imbestigasyon ha sulod han gintalaan nga panahon.
Kasumpay hine, ginhangyo han Defense team ha Pre-Trial Chamber nga tudlukon nga waray hurisdiksyon nga ginbabasehan para igpadayon pa an pagdungog kontra ha anay presidente ngan igmandu an iya dayun ngan waray kondisyon nga paggawas.
Iginbase han defense an ira hangyo ha mga opinyon nira Judges Perrin De Brichambaut ngan Gocha Lordkipanidz ha request nga igpadayon an imbestigasyon ha kaso ni Duterte dida han 2023.
Rason pa han duha nga huwes ha ICC, ginbubuhat han prosecutors an ngatanan han paningkamot agud igpatuman an hurisdiksyon han korte ha pamaagi nga dire matatalapas an katungod han usa nga estado nga umiwas na tikang ha Statute.
