TACLOBAN CITY – Nagin malinampuson an gindumara nga Government Job Fair 2025 han Civil Service Commission VIII kasugbong an magkalain-lain nga ahensya kakulop nga adlaw, Setyembre 5.
Ini in kaparte han 125th Philippine Civil Service Anniversary, kun diin may-ada 22 participating agencies ha bug-os nga rehiyon an naki-usa.
Sumala kan Civil Service Commission Director III, Atty. Flordeliza Algas, ha nasabi nga Job Fair, mayda 150 nga mga plantilla position an abilable, samtang 120 naman ha mga non-plantilla position.
Dugang pa han nasabi nga opisyal, an nasabi nga Job Fair, in nagpapanuyo nga mabuligan an mga job seekers nga magkamayda hin trabaho.
Kumo kaparte gihapon han 125th Civil Service Anniversary in magdudumara hin magkaduro-dilain nga aktibidades an CSC-8 sugad han Fun Run nga pagbubuhaton ha Provincial Government, Palo, Leyte, yana nga September 7.
Papartisiparan ine han mga empleyado ha gobyerno ngan pribado nga sektor.
May-ada gihapon “Government Treats” kun diin may-ada mga establisyemento nga maghahatag hin discount ngan treats para ha mga empleyado han gobyerno; kinahanglanon la nira nga magpakita han ira Government ID.
Nakatalaan gihapon nga pagbuhaton an “Tree Growing Activity” ha iba iba nga field offices, nga kinada-tuig nga ginbuhat agud igduso an pag-atiman han kalibungan.
Gin-aaghat naman han Civil Service Commission an publiko nga makiusa ha mga aktibidades. Pwede gihapon nga bisitahon an ira Facebook page ngan official website para han kadugangan nga nga impormasyon. (via Bombo Shiela Encio)
