Usa nga lalaki an natad-an nga patay ha usa nga kanal dapit may Maharlika Highway ha Brgy, Diaz, Gandara, Samar dida han nakalabay nga adlaw.
Ginkilala an biktima kan alyas “Sonny”, 39-anyos, inasaw-an ngan residente han Brgy. Sto. Nino, Gandara, ngan miyembro han 8th Infantry Division, Philippine Army.
Basar han impormasyon, nga posible in aksidente nga nahulog an biktima ha kanal samtang nagdra-drayb ini han iya motorsiklo, ngan mahitungod nga maburong an nasabi nga lugar in waray hini kakit-a an nasabi nga kanal.
Dayon naman nga rumesponde an mga otoridad ha lugar han insidente mahuman hira makakarawat hin report tikang han usa nga concerned citizen nga mayda patay nga lawas han lalaki ha kanal, samtang ini in nag-iinspeksyon hin warning signs ha lugar.
Dayon gihapon nga ginrekober han mga otoridad an lawas han biktima kaupod an iya motorsiklo ngan personal nga gamit ngan service firearm. Nadiskubrehan gihapon han mga ini nga mayda samad ha agtang an biktima nga posible nagin kawsa han pagkamatay hini.
Gintutohan naman nga pira na ka-oras an naglabay ugsa naman madiskubrehan an biktima nga naglulutaw-lutaw ha creek.
Ha pagkayana in padayon pa an imbestigasyon han mga kapulisan agud mabaruan kun self-accident o kun may foul play nga nahitabo. Ginhuhulat gihapon nira an resulta han autopsy kun posible under influence han makahurubog nga irimnon an biktima ugsa natabo an insidente.
