Ginduduso han Office of the Student Regent an hangyo nga utro ikonsidera an presente nga graduation protocol han Leyte Normal University (LNU) kasumpay ha pagpapasaka han mga kag-anak o guardians ha stage samtang ginkakarawat han mga estudyante an ira diploma ha Graduation Exercises para han Academic Year 2025-2026.
Ha ilarum han presente nga protocol han unibersidad, mga kag-anak o guardians la han mga naghuman nga may Latin Honors an gintutugotan nga makaupod ha entablado ha oras han awarding ngan pagkarawat han diploma. Mahitungod hini, ginhahangyo han Office of the Student Regent nga matagan gihapon hin higayon an mga kag-anak o guardians han mga non-Latin graduates nga makaupod an ira mga anak ha pinaka-importante nga parte han ira kinabuhi kumo istudyante.
Sumala kan Student Regent ngan LNU Supreme Student Council President Jon Ivan Torreros, panuyuan han ira hangyo nga magin patas ngan makatawo an graduation ceremony.
Dida mangud han mga nakalabay nga tuig, nagin mapaso nga himangrawon ha social media ngan online student discussions an graduation protocol han nasabi nga unibersidad. Kaupod an limitasyon ha pagpapasaka han mga kag-anak ha entablado nga para la ha mga honor graduates ngan an pinili nga pagpapasakob ha venue han ceremony.
Sumala pa kan Torreros nga pira nga mga istudyante an nagpahayag han pagkadismaya ha sugad nga sistema.
Dugang pa hini nga an ira hangyo in dire nangangaruyag signgon nga ginruruba an tradisyon han unibersidad, kinahanglanon la bag-uhon agud waray maagrabyado ha nasabi nga pitad, labi na nga iton graduation in usa nga kalampusan dire la para ha istudyante pati na gihapon ha mga kag-anak hini.
Naglalaum naman an Office of the Student Regent nga matatagan hin positibo nga konsiderasyon an ira panawagan ugsa ipatuman an Graduation Exercises han Academic Year 2025-2026 ha itaarabot nga Hunyo.
