Ginmalatumat ni UP Tacloban College Economics and Social Sciences Division Assistant Professor, Gerwyn Enerlan nga dire patas para ha ordinaryo nga molupyo an ginduduso nga balaudnon ni Sen. Rodante Marcoleta nga online voting ha senado labi na ha mga minimum wage earners.
Sumala hini nga dire ini patas mahitungod nga parehas nga nasulod ha 8-hour shift o sobra pa an ordinaryo nga government ngan private nga mga empleyado kun diin, usa la nga pag-absent hini in kakaltasan ini ha ira sweldo, samtang tutugutan an mga senador magdumara hin remote voting ha mga sesyon ha plenaryo nga kun susumahon, sumulod madire an mga ini in bayad hira.
Dugang pa hini nga kinahanglan in pag-adman ini hin maupay ngan dire ini dagmiton mahitungod nga kinahanglanon ini hin basis kun igpapatuman. Ginpapatuman mangud la iton remote voting o activities online kun mayda emergency o pandemya.
Manunumduman nga panuyuan han balaudnon in tugutan an mga senador nga makiparte o makabotos ha pamamaagi han electronic platforms bisan warya hira ha mismo nga session hall han Senado.
Sugad man, mahugot naman ini nga ginbaribadan han pira nga miyembro han Senate minority kun diin, nagresulta pa ini ha pag-walkout ha sesyon mahuman nga ginduon han majority bloc an paghisgot ha proposed amendment ha Senate rules kasumpay han online participation ngan voting.
