INTERNATIONAL–Gumawas ha mga dokumento nga ginpagawas han United States Department of Justice (DOJ) nga ginaalegar nga nag-hire an sex offender nga hi Jeffrey Epstein hin usa nga team nga naka-base ha Pilipinas agud nag tangalon ngan takpan an mga negatibo nga impormasyon kasumpay ha iya ha internet.
Kalakip ha mga email exchange nira Epstein ngan Al Seckel, nga asawa han bugto ni Chislaine Maxwell, an anay nga karelasyon ngan pangunahon nga kaupod ni Epstein ha pagrecruit hin mga menor de edad.
Ha usa nga email han ika 7 han Disyembre, 2010, ginmalatumat hi Seckel kan Epstein nga natanggal na ha Google Search suggestions an mga teermino sugad han “Jeffrey Epstein Jail”, nga ginbuhat daw han usa nga Philippine-based team.
Dugang pa ni Seckel nga nahiupod an ira grupo ha Pilipinas ha paghimo hin ga links ha ira mga website, pseudo sites, ngan iba nga mga ‘Jeffrey Epsteins of the World’.
Sumala ha US DOJ documents, naghimo an grupo hin damo nga websites ngan web pages nga nagpapakita kan Epstein kumo usa nga philantrophist, nga-popondo hin mga project nga mayada kalabutan ha siyensya, ngan maski ha sports.
Ginpahayag pa ni Seckel nga importante an pag-edit ha tala han kinabuhi ni Epstein ha Wikipedia page. Dugang pa hine, ginmalatumat niya ha usa nga email han ika 16 han Disyembre, 2010, nga usa nga ‘important victory’ an pagkontrol ha mga sulod hine mahitungod nga agsob ine nga gumawas ha mga search results ha internet.
Mababaruan nga gindakop hi Epstein han 2019 ha kaso nga sex trafficking ngan pag-aabuso ha mga menor de edad ha US ngan iba pa nga nasud, ngan namatay samtang nakapreso ha New York Jail
