TACLOBAN CITY – Padayon an pag-akomodar ngan pagtapo han Overseas Workers Welfare Administration (OWWA) Regional Office 8 ha mga repatriated OFWs nga naulpot ha rehiyon tikang pa han nakalabay nga bulan han Mayo.
Sumala kan Sergio Borgueta, Jr., Regional Director han OWWA Regional Office 8, tikang han Mayo 25 ha pagkayana in maabot na ha 8,200 nga mga OFWs an nakapanguli ha rehiyon.
Kadam-an ha mga ini in natagaan na hin assistance o bulig pinaagi han DOLE AKAP kun diin ha 6,200 nga mga aplikasyon, 4500 an naaprubahan para ha mao nga hinabang.
Nakatalaan gihapon nga makatagamtam an mao nga mga OFWs han Project EASE han OWWA o an Educational Assistance through Scholarships in Emergencies.
Ha pagkayana in nagtikang na pagkarawat hin aplikasyon an OWWA para han mao nga programa nga nagpapanuyo nga maghatag hin educational assistance ha mga anak han mga repatriated OFWs nga nawarayan hin trabaho tungod han COVID-19 health crisis.
Nahibaruan nga ha rehiyon in mayda 203 slots nga gin-alutaga para han mao nga programa han OWWA.
