TACLOBAN CITY – Ginlalauman han North Hill Arbour Integrated School nga madudugangan pa an ihap han mga istudyante nga nagpaka-enroll ha ira iskuylahan ha kaluyo han pagtitikang na han klase.
Sumala kan North Hill Arbour Integrated School Head, Harold Naputo, ha pagkayana in ada pala manggud ha 1,141 an urhi nga ihap han mga istudyante ha nasabi nga iskuylahan kun diin an ira ginlalauman nga ihap in ada ha 1,250 nga istudyante.
Ginbabana-bana naman hine nga naurhi la ine ha pagpa-enroll ine nga sobra 100 pa nga istudyante mahitungod han ka-pyestahan han nasabi nga lugar.
Dida manggud han Lunes, Hunyo 16, kadungan han pag-aabri han klase para ha SY 2025-2026 in amu gihapon an kapyestahan han ira lugar kun diin posible daw nga nabusy pa an mga ine ngan kag-anak hine.
Dugang pa hine, importante gudman nga makagpa-enroll na an mga ine yana nga semana mahitungod nga an nasabi nga ihap an nagigin basaranan han Department of Education para han ira paghahatag hin mga bulig ngan iba pa nga ayuda ha mga istudyante.
Sugadman, naglalaum hi Naputo nga makakagpa-enroll an adton mga waray pa makag-enroll kutob ngada hiton ikaduha kasemana han klase agud mapinalisa na an ihap han mga istudyante.
