METRO MANILA – Utro nga nagpahimatngun an GCash ha publiko nga magin mabantayon ngan mahirot agud maproteheran an kalugaringon kontra ha nagtitikadamo nga online scams ngan fraud yana nga Semana Santa.
Sumala ha GCash, kaupod han pagdamo han online users in an paghitaas gihapon han mga scam nga nansisingabot ha mga indibidwal, kaupod na an may mga sumpayan ha government subsidy payouts sugad han fuel subsidy program han Land Transportation Franchising and Regulatory Board ngan Department of Social Welfare and Development.
Nagpahimatngun an kompanya kontra ha mga peke nga mensahe nga nagpapanggap nga tikang ha DSWD o iba pa nga ahensya han gobyerno nga nag-o-offer hin “e-fuel voucher.” Kadaras-an ginaaghat an mga user nga mag-click hin link nga magdadara ha ira ha phishing website.
Ginklaro han DSWD nga dire hira nagpapadara hin ayuda ha pamamaagi han unsolicited text messages nga may clickable links.
Ginsagdunan gihapon an publiko nga magin mahirot ha mga spoofed messages ngan suspicious nga links nga puydi makarawat ha pamamaagi han SMS, email, o mga messaging apps. Sumala ha GCash, nga likayi an pag-click hin mgalinks tikang ha dire kilala nga numero labi na kun mayda ini offer nga libre nga benepisyo o urusahon nga promosyon.
Samtang sumala ha GCash nga padayon nira ginmomonitor ngan ginpupugngan an mga scam activities, kaupod na an pagtanggal han mga scam links ngan accounts, ngan padayon hira nakikipagbubligay ha law enforcement ngan iba pa nga ahensya han gobyerno agud maproteheran an publiko.
