Iginpapagawas ni Senator Loren Legarda an P220.39 billion nga pondo han PhilHealth nga maiha na nga gin iipit ngan dire pa naihahatag hasta yana.
Kasumpay ini han kamanduhan ni Presidente Ferdinand Marcos Jr. nga igbalik ha PhilHealth an P60 billion nga ginkuha han national government agud gamiton ha mga proyekto han gobyerno.
Kapate han kantidad an P113.44 billion nga natirok nga buwis dida han 2023 kutob 2025 tikang ha sin taxes o buwas ha mga produkto nga tabako, alcohol, ngan magtam-is nga inumon, ngan an P106.95 billion nga kontribusyon ha PhilHealth han Philippine Charity Sweepstakes Office (PCSO) ngan Philippine Amusement and Gaming Corporation (PAGCOR).
Sumala kan Legarda, Vice Chairman han Committee on Finance, angay la nga ighatag na ha PhilHealth an nakalabay nga pondo paa ha pagpapatuman han Universal Healthcare Program.
Natuod naman an senadora nga dire maipapatuman hin hul-os an programa kun paguru-gudti o atrasado an pagpapagawas hin pondo.
Pira kabeses na niya nga igin daop ha ehekutibo an kasumpay ha budget han PhilHealth pero waray la gihapon nahitatabo.
