TACLOBAN CITY- Ginpahibaro han Land Transportation Franchising and Regulatory Board Regional Office 8, nga magtitikang yana an fare increase han mga pampubliko nga sarakyan ha bug-os nga Sinirangan Bisayas.
Sumala kan Veronica Reposar, OIC Chief TDO LTFRB 8, nga tinikangan yana nga adlaw magigin P11.00 na an pamasahi para han mga nabiyahe nga tradisyunal jeep, ngan pampubliko nga sarakyan ha sulod han syahan nga upat ka kilometro nga ira padalagan.
Sugadman maabot naman ha P13.00 an pamasahe para ha mga modernize units nga mga sarakyan nga nabiyahe sugad hiton PUJ ngan Philcab, ha sulod gihapon han syahan nga 4 ka-kilometro nga kahirayo han ira biyahe.
Dugang pa han mao opisyal, ginkikinahanglan nga igpaskil han mga driver-operator an ira minimum fare matrix ha ira mga sarakyan, agud nga mahibaruan han mga commuters an bag-o nga kamanduhan nga ginpapatuman kasumpay ha dugang nga pamasahe.
Mahugot naman nga ginpahimatngunan ni Reposar, an mga operators han pampubliko nga sarakyan, nga dire singabuton an higayon nga manlimbong ha mga pasaheros ngan magpanunubra panukot hiton pamasahe, pananglitan nga may mahibaruan ngan makarawat nga report an ira buhatan in dayon an mga ine aaksyunan an nasabi nga himangrawon.
Mababaruan nga an mao nga pagpapatuman han fare increase in epektibo nga ginpalusad ngada pa han Hulyo 1, yana nga tuig.
