NATIONAL – Dire angay igkabaraka han publiko ngan mga eksperto kasumpay han ginlalauman nga epekto ha ekonomiya han Pilipinas an panukala han Amerika nga butngan hin buwis an remittances han mga foreign workers ha ira nasud.
Sumala kan Palace Press Officer Claire Castro nga basar ha pag-aram han Department of Finance, dire pa maabot ha usa ka porsyento an ginlalauman nga epekto ha gross domestic product han nasud kun mapirmahan an nasabi nga balaudnon.
22 percent la han 4.4M nga OFWs ha Amerika an maapektaran, particular na an mga non-US citizens kaupod an mga green card holders ngan may working visas.
Dugang pa han DOF, dire sakop han kabug-usan nga 41 percent han remittance nga nakakarawat han Pilipinas tikang ha Amerika in tikang ha mga Pilipino ngadto, matungod nga kadam-an in ginpapaagi ha mga bangko nga transaksiyon.
Sumala naman ha Bangko Sentral ng Pilipinas, 90% han remittance han mga OFW ha Amerika in gingagastos ha pagkaon ngan kinahanglan ha balay han ira pamilya dinhi ha nasud.
