TACLOBAN CITY – Padayon an ginbubuhat nga imbestigasyon han mga otoridad ala kontra ha duha nga pulis nga gintutuuhan nga suspek ha brutal nga pagpatay ha 26 anyos nga babaye nga hi Ellen Joy De Guia.
Una hini, dida han Mayo 22 yana nga tuig, nakit-an an patay nga lawas ni De Guia ha usa nga drainage canal ha Brgy. Salhag, Rosario, Northern Samar kun diin gintuuhan nga ginlugos ini mahitungod naluslos na ha may tuhod hini an iya underwear ngan shorts han makit-an.
Sumala kan PSSgt. Paul Lazaro, Investigator han Rosario MPS, iginpasaka na nira an kaso nga murder ha piskalya ala kontra ha duha nga pulis, pero nagbaribad ini nga ngaranan an mga suspek.
Pero ha report han Inquirer.net nagawas nga ginkakanit an ngaran nira Patrolmen Joker Dapulag ngan Joemil Bantayan ha nasabi nga krimen.
Subay ha imbestigasyon, nahibaruan nga hi Dapulag ngan an biktima nga hi De Guia in gin aalegar nga magkarelasyon ngan daw an urhi nga magkaupod pira kaoras san-o makit-an an patay nga lawas hini.
Nahimo gihapon nga maabrehan han bugto ni De Guia an social media account hini ngan didto daw nahisabutan nga nagkaada hin away an biktima ngan hi Dapulag mahitungod han gintutuuhan nga third party.
Ha gumawas nga resulta han DNA test tikang ha Camp Crame, nag-match an dugo nga nakit-an ha sarakyan ni Dapulag han dugo nga tikang ha biktima.
Ini daw in makusog nga ebidensya nga nakadto han sarakyan han suspek an biktima han patayon ine.
Samtang, negatibo naman ha gumawas nga resulta ha laboratory test han seminal sample nga nakuha ha pribado nga parte han lawas han biktima sanglit igindismiss na han mga otoridad an anggulo nga rape.
Gintutuuhan liwat nga kasabwat ni Dapulag an usa pa nga pulis nag hi Bantayan ngan gin- aalegar magkaupod an mga ine han mahitabo an insidente.
Nakit-an gihapon han mga kapulisan ha sarakyan han suspek an usa nga money remittance receipt nga pagpapamatuod nga nagpadara hi Dapulag hin kwarta kan Bantayan.
Samtang, naghaon gihapon hin complaint for obstruction of justice an mga kapulisan ala kontra ha usa nga sibilyan nag hi David Loberiano nga nagprobar nga lipaton an imbestigasyon pinaagi han pagpost hini ha social media nga usa nga nag-ngangaran nga “Junjun Loberiano” an tinuod nga murderer ni Ellen Joy nga ha tikaiha in nadiskubrehan nga himo-himo la an mao nga ngaran.
Ha pagkayana in nagpapabilin ha kustodiya han Personnel Administrative Unit han Northern Samar Provincial Police Office hira Dapulag ngan Bantayan samtang padayon an imbestigasyon han kaso.
Magpapabilin liwat nga inosente an mga suspek hangtud mapamatud-an han korte nga guilty an mga ini.
