Utro nga nanawagan an usa mambaralaud para ha pagsususpinde o pag-iiban han “excise tax” ha produkto han lana may paghisumpay ha padayon nga pag-umento han presyo han lana.
Sumala kan Navotas City Rep. Toby Tiangco, puydi ipatuman an suspensyon ha excise tax mahitungod nga nakabutang mangud ha ilarum han Republic Act No. 12316 nga may kapas an gobyerno nga himuon ngan ipatuman ini.
Ini nga panawagan in mahitungod han pag-umento ha P8.82 kada litro han diesel, P4.88 ha gasolina, ngan P6.47 ha kerosene nga nagresulta ha sobra P15 nga paghitaas ha presyo han mga produkto hiton lana ha sakob la han tulo ka-semana.
Natuo naman an mambaralaud nga an presente nga sitwasyon in usa nga mabug-at nga rason kun kay-ano kinahanglan andam nga suspendiron o ibanan anay han gobyerno an “excise tax” ha produkto hiton petrolyo.
