TACLOBAN CITY– Naka-standby ngan naka pre-position na an mga relief goods para ha mga posible maapektaran han Bagyong Ada ha Sinirangan Bisayas.
Sumala kan Atty. Jonalyndie Chua,Regional Information Officer, Department of Social Welfare and Development Regional Office Vlll, maabot ha 149,328 nga mga family food packs an naka-andam han ira buhatan tikang pa han nakalabay nga tuig.
Dugang pa hine, mayda gihapon 17, 529- assorted non-food items, kalakip na dinhe an mga sleeping kits, ngan hygiene kits.
Naka-andam gihapon an 11,973- ready to eat food packs para ha mga mag-eevacuate nga pamilya ha evacuation center.
Ginmalatumat naman hine na mayda naka pre-position nga mga relief items, ha kada LGUs ngan probinsya ha rehiyon nga mayda mga warehouse.
Sugad hiton masunod; Samar 16,943, Eastern Samar 18,474, Leyte 74,234, Southern Leyte 18,500, ngan Biliran 4,311 nga mga relief items.
Naka depende naman ha mga LGUs kun mag re-request hira hin kadugangan nga family food packs ha ira nasasakupan pananglitan nga kulangon an ira naka standby nga relief items.
Ginklaro hine nga an usa nga family food packs in sakto ha 1-3 ka-adlaw ha 1-5 nga miyembro hiton pamilya, pananglitan nga 10 an miyembro han usa nga pamilya nga apektado, pwede an mga ine mag-avail hin duha nga family food packs.
