NATIONAL – Naglalaum hi Finance Sec. Ralph Recto nga an 0.9% nga inflation rate dida han Hulyo, an pinakahamubo ha sakob han unom ka-tuig, in makakaghatag hin dako nga ginhawa ha kablas nga pamilya.
Ini in matungod na ha padayon nga paghamubo han presyo han pagkaon, labi na han bugas ha nasud.
An average inflation tikang Enero kutob Hulyo in 1.7% mas hamubo ha target han gobyerno nga 2.0% kutob 4.0% nga nagpapasabot han karig-on han presyo han mga papliton.
Sumala kan Recto, importante nga maabatan han kada Pilipino an paghamubo han presyo han bugas, pagkaon, kuryente, ngan iba pa nga pankinahanglan.
Eksplikar pa han sekretarya nga dako an nagin ambag ni Pres. Ferdinand Marcos Jr. ha pamamaagi han iya mga programa sugad han “Benteng Bigas” ngan Kadiwa ng Pangulo.
Nakabulig gihapon an pagpapatuman han hamubo nga taripa.
Ha luyo hini in nagpapabilin nga alerto an gobyerno ha mga posible nga tarhog ha presyo sugad han kalamidad ngan pankalibutan nga tensyon bisan pa ginlalauman an pagpapabilin nga hamubo an inflation rate ha nasud.
