NATIONAL–Natuod an constitutional law expert nga hi Atty. Domingo Cayosa nga magpapakuri ha defense team ni anay Pangulong Rodrigo Duterte an damo nga mga dokumento o record han panahon nga nagserbe hine.
Kalakip dide an mga pahayag han anay pangulo kun diin mayada konkreto nga record an midya. Damo ha mga ine in an direkta niya nga gin-amin nga ginamando an pira ka mga operasyon.
Upod gihapon hine an pira ka records kanit han mga biktima han extra-judicial killings o mga anti-illegal drugs operation kun diin gintutudlok ha mga police records nga nakigbisog an mga subject person.
Sumala kan Cayosa, dako nga ayat dide an record kasumpay ha kun gaano kadamo ha mga kaso an ginimbestigahan, ngan kun gaano kadamo nga kapulisan an gin-convict.
Labot hine, pira ha mga witness in ginaalegar nga nagserbe gihapon kumo miyembro o parte han ‘Davao Death Squad (DDS)’, an gintutudlok nga ada ha likod han pira nga mga pagpatay kanit ha illegal drugs campaign.
Sumala kan Atty. Cayosa, dire makakatakas an defense team han anay pangulo ha mga nasabi nga record, nga sigurado nga igprepresenta han prosecution team.
