NATIONAL – Utro nga nagpahimatngon an buhatan han Department of Agriculture ha publiko nga mag-ikmat ha pagpalit hin mga kontrabado nga sibuyas nga posible magdurot hin komplikasyon o sakit ha panlawas.
Ini an nagin pahayag han ahensya mahuman nga magpositibo ha E. cloi an sample han ilegal nga sibuyas nga nakompiskar ha operasyon han DA ha Paco Public Market han nakalabay nga semana.
Kun manunumduman nga siyahan iginmando ni DA Secretary Francisco Tiu Laurel Jr. an pagkompiskar ha nasabi nga produkto mahitungod nga smuggled ini ngan posible nga tumalapas ha Food Safety Act of 2013.
Kasumpay hini, ginmandohan gihapon han ahensya an Bureau of Plant Industry ngan iba pa nga unit han ira departamento nga bantayan an mga smuggled nga sibuyas ha mga merkado ha nasud.
Ginhahangyo na gihapon han DA an bulig han PNP agud madakop an nagpapaluyo han pagpapasulod han smuggled nga sibuyas ha nasud.
An nasabi nga pitad han ahensya in kasunod ha direktiba ni Pres. Ferdinand Marcos Jr. nga dakpon an tanan nga mga dabi ha agri-smuggling agud maproteheran an halin han mga lokal nga parag-uma han Pilipinas.
