NATIONAL– Nagpahimatngon an Department of Agriculture nga dire puydi gamiton nga rason han mga rice trader an P20 nga kada kilo han bugas agud baraton an presyo han gin-harvest nga mga humay han mga lokal nga parag-uma.
Siyahan na nga nahipatik nga naaraba an mga parag-uma ha Northern ngan Central Luzon mahitungod ha P10 nga baligya ha kada kilo han humay.
Nababaraka gihapon an Samahang Industriya ng Agrikultura (SINAG) nga waray na gaganansyahon an mga parag-uma kun mas hitaas pa an production cost kompara ha ira magigin halin .
Ginmalatumat ni Department of Agriculture spokesperson Arnel De Mesa nga ginmanduhan na ni DA Sec. Francisco Tiu Laurel Jr. an ira inspectorate enforces nga kadtuon an mga lugar nga may napalit hin P10 kada kilo han ira humay han mga parag-uma.
Duon ni De Mesa, ginpalit ha P24 an humay nga gingagamit yana ha P20 nga bugas sanglit waray rason agud paliton ha hamubo nga presyo an mga humay.
Nagbubug-os na gihapon an DA kun ano an igpapasaka nga sirot ha mga trader nga mapapamatud-an nga naniningabot ha sitwasyon.
