Naaabat na han mga negosyo nga retail an epekto han kasamok ha Middle East, mahitungod nga mas nagigin mahirot na an katawhan ha paggastos ngan mas ginpipili nga magtipid.
Subay ha Philippine Retailers Association, huminay an kadako han mamaralit ha mga tindahan dida han syahan nga katunga han Abril. Ini in durot han tigdaay nga rekasyon han katawhan ha hitaas nga presyo han gasolina ngan ha pankabug-usan nga kawaray hin kasiguraduhan ha ekonomiya, kun diin kun dire sigurado an mga katawhan ha kabubwason, in mas ginpipili nira nga igdelatar la anay an paggastos ngan magtirok la anay.
Dugang hini, nakaapekto gihapon an bakasyon dida han Semana Santa ha paghinay han pamaligya.
Samtang nag-iiha an tensyon ha iba nga nasud, damo nga negosyo an naghihirot ngan naghuhulat anay ugsa maghimo hin dako nga desisyon. Gintatalinguha gihapon han mga retailers nga ibanan an ira mga paninda ngan gastuson agud malikayan an pagkalugi.
Paa ha pira nga negosyante, an presente nga krisis in usa ha pinakaduro ha pankalibutan nga lebel, sanglit mas nagigin mahirot dire la an mga negosyo kundi hasta an mga mamaralit. Mahitugod hini, ginlalauman nga iibanan han mga kumpanya an ira mga plano ha pagpapahaluag han negosyo, sugad han pag-aabri hin mga bag-o nga tindahan.
Bisan pa man kun may-ada paghamubo ha presyo han gasolina di pala maiha, nagpapabilin la gihapon ini nga hitaas,
Mahitungod hini, humitaas an gastos han mga industriya nga naglalaum ha lana sugad han transportasyon, agrikultura, ngan enerhiya.
Ha katapusan, napipiritan an pira nga negosyo nga maghitaas han presyo o mag-iban han operasyon, sugad han pagpapahaligot han oras han abri han ira mga establisyimento, agud maibanan an epekto han krisis.
