Nagsalawad hin kaso nga kriminal hi Atty. Manases Carpio, asawa ni Vice President Sara Duterte, kontra ha pira nga opisyal han Bangko Sentral ng Pilipinas (BSP), Anti-Money Laundering Council (AMLC), ngan pira nga kongresista ha Quezon City Prosecutor’s Office.
Kaupod ha mga iginrereklamo hira BSP Governor Eli Remolona Jr., AMLC Executive Director Ronel Buenaventura, ngan pira nga membro han Kamara sugad kanda House Committee on Justice Chair Gerville Luistro, Percival Cendaña, Chel Diokno ng Akbayan Party-List, ngan Mamamayang Liberal Party-List Leila de Lima.
Basar ini ha daw pagtalapas ha Anti-Money Laundering Act, Bank Secrecy Law, ngan Data Privacy Act mahitungod ha pagtalapas han sensitibo nga banking records.
Ini in kasunod han report han AMLC ha Kamara de Representantes nga mayda haros P6.77 billion “suspicious” ngan “covered” transactions nga konektado kanda VP Sara Duterte ngan Carpio ha sulod han duha ka-dekada.
Subay ha AMLC, kalakip hini an bilyones nga sumulod ngan gumawas ha iara mga account, samtang mayda gihapon nga parte nga dire matudlok han luma nga sistema.
Duon ni Carpio, ilegal an pagpagawas han mga rekord ngan ginagamit ini para ha
“black propaganda” kontra ha pamilya Duterte, labi na ha butnga han mga isyu politikal ngan impeachment proceedings.
Dugang pa, protektado han balaod an bank records ngan dire dapat ini iginpapakita.
