TACLOBAN CITY– Ginpaangbit hiton City Population Office, nga kinada tuig nagtitika- hitaas an kaso hiton mga teenage pregnancy ha syudad hiton Tacloban.
Sumala kan OIC City Population Office, Hedeliza Ramos, Population Program Officer III, nga subay ha ira datos han nakalabay nga 3 katuig maikokonsidera nira nga nagtitikahitaas an kaso han sayo nga mga nagbuburod.
Subay ha ira datos, han tuig 2022- nakaghipatik hira hin 306 cases han teenage preganacy, samtang an tuig 2023 naman in nakaghipatik hira hin 336 cases, ngan pag-abot han 2024 in hinmitaas pa ine kun diin umabot ine ha 392 cases.
Dugang pa ni Ramos, ha kaluyo han ira ginduduso nga information dissemination ha kada barangay hiton syudad, dire gudla gihapon napupugngan an mga kabataan, matungod nga an mga ine an nagdedisisyon han ira kalugaringon.
Aminado naman ni Ramos, nga ha pagkayana ada pala ha 30% pala an ira na eedukar kasumpay hiton teenage pregnancy ha bug-os nga syudad.
Nag-aaro naman ine hin bulig ha mga kag-anak hiton kabataan, nga atimanan an mga ine ngan ig-edukar ha posible nga matabo kun an mga ine in mag-asawa ngan mag-anak hin sayo nga pangidaron.
