Ginmalatumat ni SAMELCO II Institutional Services Department Head, Dickson Bernales nga an pagdumara han National Grid Corporation of the Philippines han Manual Load Dropping o MLD in an rason han pagkakamayda hin rotational brownouts ha mga lugar ha Pilipinas, partikular na ha Visayas.
Sumala hini nga nagkakamayda mangud hiton rotational brownouts kun hitaas iton demand han kuryente ngan dire nakakaakos iton planta hin paghatag hiton suplay.
Agud malikayan iton pag-blackout hiton grid, in napipiritan nga magdumara an NGCP hin MLD.
Dugang pa hini nga ha sugad nga sistema, temporaryo nga gin-uutod an suplay han kuryente ha pira nga lugar hin pira ka-oras ugsa igbalhin ha iba nga lugar, ngan dire dudrungan nga naapektaran iton konsumidor ngan mga negosyo.
Samtang, duon naman ni Bernales nga ha sugad nga mga panahon kun diin, dako iton demand han kuryente, in kinahanglan in namimiling an buhatan hin pamaagi agud malikyan iton mga rotational brown outs.
Dugang pa hini nga kun damo iton out-of-service nga planta han kuryente, in kinahanglan namimiling hin alternatibo nga pagkukuhaan hin enerhiya an NGCP.
Punto hini nga an sagunson nga pagkakamayda hin power interruptions in dako iton nagigin epekto ha mga molupyo labi na ha ira mga pakabuhi nga magpapalugi lugod hiton ekonomiya han nasud.
