Nagkatitirok an mga lokal nga negosyante tikang ha magkadurudilain nga bungto han Leyte ha gindumara nga trade fair han Department of Trade and Industry Leyte ha Tacloban City kumo kaparte han pagserebrar han ka-piyestahan han syudad.
Sumala kan DTI Leyte Provincial Director, Faustino “JoJo” Gayas Jr., panuyuan han aktibidad nga igpahalawig pa an merkado han mga produkto nga himo ha Leyte ngan matagan hin mas damo nga oportunidad an mga gudti nga mga negosyo.
Aada ha kabug-usan nga 36 nga micro, small, and medium enterprises o MSMEs tikang ha mga bungto han Leyte an nagpartisipar ha lima ka-adlaw nga trade fair nga gindudumara ha usa nga mall ha Marasbaras.
Samtang, magkadurudilain maman nga produkto an tampok han trade fair, kaupod an mga locally processed food, irimnon, handicrafts, ngan mga bado. Tampok gihapon dinhi an mga agricultural products ngan himo ha gatas nga tikang ha Leyte.
Sumala pa kan Gayas, nga an mga nasabi nga produkto in nagrerepresenta han paningkamot ngan creativity han mga negosyante nga Waraynon ngan taga-Leyte.
Dugang naman hini nga ginlalauman nira nga makakaghipatik an nasabi nga aktibidad hin milyon-milyon nga halin para ha mga negosyante tikang han pagdamo han mga mamaralit ngan mga mabisita han syudad.
Padayon naman nga gin-aaghat han DTI an publiko nga suportaran an mga produkto nga lokal kumo kaparte han pagduduso han pagribhong han mga gugti nga mga negosyo ngan mapa-ursa an ekonomiya ha Eastern Visayas.
