Humitaas hin dako an presyo han kuryente ha Wholesale Electricity Spot Market (WESM) dida han Mayo mahitungod ha hitaas nga demand ngan limitado nga suplay han kuryente.
Sumaka ha 38.5% an system-wide WESM rate tikang ha P5.63 kada kilowatt-hour dida han Abril tikadto ha P7.79 kada kWh.
Subay ha Independent Electricity Market Operator of the Philippines (IEMOP), an duro nga kapaso han panahon an nagduso ha paghitaas han konsumo han kuryente. Kadungan hini, pira nga planta han kuryente an temporaryo nga umundang ha operasyon, nga mas nagpahugot ha suplay han kuryente ha nasud.
Pinakahitaas nga nagin paghitaas han presyo ha Visayas, kun diin umabot ha P10.20 kada kWH an WESM rate. Humitaas gihapon an presyo ha Luzon ngan Mindanao. An mga nasabi nga paghitaas in ginlalauman nga magdudurot hin mas hitaas nga sukot hin kuryente han mga konsyumer yana nga bulan.
Samtang, an susrunod nga yellow ngan red alerts ha Luzon ngan Visayas in nagresulta hin rotational brownouts ngan nagpaduro ha mga pagkabaraka ha kakulangan hin suplay han kuryente. Mahitungod ha padayon nga mahuot nga kondisyon hin suplay, ginlalauman nga posible pa humitaas an presyo han kuryente ha mga masunod nga semana.
