Nangaro hin pasaylo ha iya social media hi anay Mister Supranational Philippines 2024 Brandon Espiritu mahuman an iya kontrobersyal nga komento kasumpay ha mga beauty pageant contestant nga mayda halo nga ‘foreign blood’ o gintawag niya nga “halfies.”
Nag-ugat an isyu ha usa nga viral nga balyuay han komento ha Instagram ha butnga ni Espiritu ngan Filipino-American model ngan pageant titleholder nga hi Jether Palomo. Ha nasabi nga conversation, ginmalatumat ni Espiritu nga makukurian nga makigsabayan an Pilipinas ha national pageant kun waray an mga Pilipino nga mayda dugo nga langyawanon.
Hi Palomo, nga kaurugan nga nagrerepresenta ha Pilipinas ha mga male pageant, in ginkoronahan nga Mister Pilipinas Global 2025 ngan nagin tinaglawas han nasud ha Mister Global 2025, kun diin naghuman hiya ha Top 11. Ugsa ini, nakilala gihapon ini kumo grand winner han usa nga canned tuna brans ngan first runner-up ha Mister Tourism World 2023 nga gindumara ha Brazil.
Dumuro an kontrobersiya mahuman magkomento hi Palomo hin “I pledge allegiance to the flag,” nga natudlok ha bandera han Estados Unidos, kasumpay han usa nga pagenat segment kun diin ginpatukar an mga kaapit gamit an ira kalugaringon nga lenggwahe. Bumaton naman hi Espiritu hin, “Raise that flag brother.”
Usa nga netizen an nagpakiana kun kay-ano waray nagkakantag ha Tagalog bisan kun mayda mga kaapi nga tinaglawas han Pilipinas. Dinhi in ginmalatumat ni Espiritu nga dire man hira naukoy ha Pilipinas. Ha igmalatumat han netizen nga unta in iba nga nasud nala an ira gin representa, bumaton hi Espiritu nga: “Tell that to all the front runners for the Philippines. This country wouldn’t have a chance on the national stage without us halfies.”
Mahitungod ha nasabi nga pahayag, damo nga netizen an nag-react ngan nadismaya labi na nga bulan han pagigin libre han Pilipinas ngan nagpahayag nga baga-baga hin ginmiminos hini an kapas han mga Pilipino fully blooded nga magdaog ha international pageant.
Mahitungod hini nagpagawas hin pahayag hi Espiritu agud mangaro hin pasaylo ngan klaruhon an iya nagin komento online.
Gintagan-duon hini nnga dire niya panuyo nga minuson an mga kalangpusan han mga Pilipino nga nagre-representa han nasud ha magkadiru-dilain nga kompetisyon.
Nangaro gihapon hiya hin pag-intindi ha publiko ngan naghangyo nga dire igdamay an iya mga negosyo, empleyado, ngan iba pa nga organisasyon nga mayda koneksyon ha iya mahitungod nga waray hira kalabutan ha kontrobersiya.
