TACLOBAN CITY – Ginsisiguro han Calbayog city government nga ha oras nga maging abelable na an COVID-19 vaccine ha Pilipinas, in tatalinguhaon han ira lokal nga pangobyernuhan nga makapalit han mao nga mga bakuna para han ira mga molopyo.
Sumala kan Ronald Ricafort, tagapagyakan han Calbayog City government, han naglabay pa nga tuig napaghingadayan na han IATF han syudad an bahin han pagpalit hin mga bakuna pananglitan nga umulpot na ini ha nasud pero ha pagkayana in waray pa specific fund nga nakaalutaga para hini.
Ginpatapod naman hini nga mayda supresyente nga pondo an Calbayog city para ha pagpurchase han bakuna ngan ha masunod nga meeting han Calbayog IATF in posible nga paghingadayan na an pondo nga ig-aalutaga hini ngan kun hira hin-o an magiging prayoridad hini.
Samtang, padayon naman nga nadudugngan an COVID-19 cases ha Calbayog kun diin ha pagkayana in mayda na sobra 80 nga active cases an mao nga syudad ngan 11 deaths tikang ha sobra 800 nga ihap han total cases hini.
