ENTERTAINMENT – Duha pa nga mga miyembro han sikat nga K-pop boy band nga BTS, hira Kim Nam-joon o RM ngan Kim Tae-hyung o V, in opisyal nga nakagawas ha militar dida han nakalabay nga adlaw, Martes, Hunyo 10.
Natapos ni RM an iya 18 ka bulan nga mandatory nga serbisyo militar ha Hwacheon, Probinsya han Gangwon.
Samtang natapos ni V an iya mandatory nga katungdanan militar ha Chuncheon, Probinsya han Gangwon.
Ha ginpaangbit nga livestream nga video han military discharge han mga miyembro han BTS, makikit-an hi RM ngan V nga nagkukumusta ha naghuhulat nga media ha gawas han military training center ha Sinbuk Sports Park, Chuncheon.
Samtang, gintratar naman han BTS leader nga hi RM an naghuhulat nga fans ngan media ha instrumental music gamit an iya saxophone.
Manunumduman nga magkaupod nga nagpalista ha militar hira RM ngan V dida han Disyembre 2023.
Samtang hi Park Ji-min o hi Jimin ngan hi Jeon Jung-kook o hi JK in nakatalaan gihapon nga buhian ha militar buwas, Hunyo 11, samtang hi Min Yoon-gi o Suga, nga nagseserbisyo komo social service worker, in nakatalaan nga matapos an iya alternatibo nga serbisyo ha Hunyo 21.
Ginlalauman an pagbalik han BTS ha urhi nga bahin han 2025 o temprano nga bahin han 2026.
