BORONGAN CITY – Nagdeklara hin Pork Holiday an syudad han Borongan agud malikayan an dugang nga pagsarang han Afican Swine Fever ha mga baboy.
Nagin epektibo an EO No. JIDCA-025-0425 tinikangan kakulop nga adlaw, Abril 4 ngan mag-iiha naman kutob Abril 18.
Sumala kan Borongan City Mayor Jose Ivan Dayan Agda, an nasabi nga pitad in gin rekomenda han ira City Veterinary Office ngan City Agriculturist Office agud mapugngan an pagsarang pa hine.
Karuyag sidngon, temporaryo nga igbabawal an pagbaligya, pag-ihaw, ngan pagkunsumo han produkto nga baboy nga tikang ha lokal nga produksyon.
Pero pwede naman magbaligya ngan kumaon hin baboy nga dire tikang ha lokal nga produksyon basta mayda la igpapakita nga Certificate of Meat Inspection (COMI) tikang ha City Veterinary Office nga nagpapamatuod ngan nagsisigurado nga talwas an gin-ihaw nga baboy.
Samtang, makakakarawat naman hin ayuda-pinansyal an mga rehistrado nga parag-baligya hin baboy nga maa-apektaran han nasabi nga pork holiday, pero waray pa naman eksakto nga kantidad kun pira an makakarawat han mga ine.
