NATIONAL NEWS– Gin-anunsyo ni Cebu City Mayor Nestor Archival an makasurubo nga trahedya ha Binaliw Landfill mahuman ine nga magparik matungod han kadamo hiton basura pasado alas 4 hiton kulop Enero8.
Subay ha report nga nakarawat han alkalde, ginbabana-bana nga 94 nga mga trabahante an nakadto ha Binaliw Landfill han matabo an insidente kun diin 27 ha mga ine an natrap ngan natabunan.
Ha gindumara nga rescue operation han pasado alas-10 han gab-i siyam nga mga trabahado an natalwas tikang ha nasabi nga lugar, samtang usa naman an kumpirmado nga patay.
Ginsigurado han alkalde nga dire hira maundang ha pamiling han nasasalin pa nga 18 nga mga trabahador.
Nagpatapod naman ine nga ighahatag an tanan nga mga bulig ha pamilya han biktima.
Nakatalaan gihapon nga makighimangraw hi Mayor Archival ha mga operator han landfill yana nga adlaw agud nga siguraduhon an dayon nga aksyon agud nga malikayan an kaparehos nga insidente.
Temporaryo naman nga gin-undang an tanan nga aktibidad ha paglabog han basura ha nasabi nga landfill kumo baton han landslide.
