NATIONAL NEWS– Naghaon hi Leyte Rep. Ferdinand Martin Romualdez hin House Bill No. 7663 nga nagpapanuyo nga maghatag hin P3,000 nga kinada bulan nga pensyon ngan social protection package para ha mga kwalipikado nga kalagsan, may kapansanan ngan parag-uma nga dire sakop hiton SSS, GSIS, o pribado nga retirement system.
Sumala kan Romualdez, importante an pagkakamayda hin pensyon uagud nga matagan hin kasiguraduhan ha pananalapi an mga parag-uma, nga agsob in may hamubo ngan waray kasiguraduhan nga kuhida, ngan napipiritan nga magtrabaho lahos ha oras.
Dugang pa hine, makakabulig an regular nga pensyon agud nga maibanan an ira paglaom ha pamilya ngan malikayan an pagbabaligya hiton ari-arian para ha pan-adlaw-adlaw nga garastusan.
An balaodnon nga, “Comprehensive Farmers’ Pension and Social Protection Act,” in ginduduso ni Tingog Party-list Rep. Jude Acidre.
Gintudlok naman ine nga balaodnon an paghahatag han P50,000 basic life insurance kutob P25,000 accident ngan disability assistance kada claim.
An Department of Agriculture, kasugbong an Department of Social Welfare and Development ngan Philippine Crop Insurance Corp., an mangunguna ha implementasyon han programa, samtang an pondo in iglalakip ha tinuig nga budget ha DA ngan DSWD.
