TACLOBAN CITY — Mahugot an preparasyon han Bureau of Fire Protection (BFP) Region 8 para masigurado an seguridad han publiko durante han pagsaurog han Undas 2026, pinaagi han pagpatuman hin mga pitad ha pagpugong han sunog ngan pag-andam ha pagresponde.
Sumala kan FCINSP. Vic Leonel L. Macasil, acting chief han Regional Operation Division han BFP-8, ginhihimo na nira an mga kinahanglanon nga pagpangandam, upod na an Oplan Kaluluwa, kun diin lakip dinhi an mga operasyon han ahensya durante han Undas.
Kaparte han ira mga pangandaman an pagdumara hin fire safety inspection ha mga bus terminal, sementeryo, simbahan, pantalan ngan iba pa nga mga lugar nga ginlalauman nga damu an mga tawo. Panuyo hini nga masiguro nga nasusunod an mga fire safety requirement ngan malikyan an mga insidente hin sunog.
Ginpahugot liwat han BFP-8 an paghatag hin impormasyon mahitungod ha fire safety ngan mga pahimatngon ha publiko agud malikyan an mga aksidente ngan insidente hin sunog. Samtang, andam na gihapon an ira Emergency Operations Center ha regional ngan provincial offices para ha madagmit nga koordinasyon, reporting ngan monitoring.
Ginpatapod han BFP-8 nga andam ngan magagamit dayon an ira mga kagamitan, pareho han fire truck, ambulansya, rescue vehicle ngan iba pa nga emergency response equipment, agud makahatag hin madagmit nga serbisyo ha publiko kon may-ada emergency durante han pagsaurog han Undas 2026.
