TACLOBAN CITY — Gutíay la an pagsaka han presyo han humay ha Eastern Visayas, kun diin aada ha P22 tubtob P22.50 kada kilo an buying price, samtang nakakaapekto ha presyo han lokal nga bugas an pag-abot han imported rice ha merkado.
Sumala kan Frederic Dy, presidente han Grains Retailers Confederation of the Philippines o GRECON ha Eastern Visayas, posible nga nadugangan hin 50 sentimos kada kilo an presyo han humay.
Ginpahayag ni Dy nga usa han mga rason han mas mahal nga presyo han lokal nga bugas amo an buying price han humay, upod na an mga gastos han mga parag-uma ha produksyon, pareho han abono ngan pagpasweldo ha mga trabahador. Sumala ha iya, aada ha 150 pesos kada sako an kaibahan han presyo han lokal ngan imported nga bugas. Ginklaro liwat niya nga waray hoarding han humay, kundi diri la nakakabaligya hin mas barato an mga parag-uma tungod han ira mga gastos ha pag-uma.
Dugang pa ni Dy, kasagaran nga mas gutiay an ani durante han ikaduha nga cropping kumpara ha summer season. Tungod hini, nagpapadayon an dako nga panginahanglan han mga miller ha humay, sanglit nag-aaragaw hira ha pagpalit ngan diri dayon nahamubo an presyo hini.
Samtang, nagtitikahuman na an presente nga panahon han pag-ani, ngan ginlalauman nga magtitikang utro an pagtanom ha Disyembre tubtob Enero kun diin kinahanglan hin igo nga suplay hin tubig durante hini nga panahon agud makapadayon an mga parag-uma ha pagtanom, ngan makakaani hira utro ha Marso.
