PARANAS, SAMAR—Humitaas an power rate han Samar II Electric Cooperative (SAMELCO II) yana nga Oktubre, kun diin tikang ha P14.77 dida han Setyembre, presente nga aada ha P16.23 kada kilowatt-hour an power rate o katugbang hin P1.46 nga pagsaka ha kada kilowatt-hour han residential consumers.
Sumala kan Dickson Q. Bernales Institutional Services Department Head han SAMELCO II, magtitikang an pag-reading han mga metro han kuryente han mga konsumidor nga magigin basehan han ira mga power bill ha ilarum han bag-o nga rate.
Ginpaangbit ni Bernales nga usa han mga hinungdan han pagsaka han power rate amo an paghitaas han generation charge, nga kaparte han atun electricity bill kun diin 50 tubtob 60 porsyento han kabug-osan nga baraydan han kuryente.
Dugang pa niya, usa pa nga nakaapekto ha pagbag-o han power rate amo an Line Loss Congestion Cost, nga kaparte ha generation charge.
Ginklaro liwat ni Bernales nga an generation charge in usa nga pass-on charge nga gin-alutaga han mga power supplier nga iginsusukot ha mga konsumidor. Tungod hini, waray direkta nga kontrol an mga distribution utility, pareho han mga electric cooperative.
