Padayon nga ginmomonitor han Bureau of Fisheries and Aquatic Resources o BFAR Region 8 an suplay han sardinas ha Sinirangan Bisayas, kasunod han pagpapatuman han closed fishing season hini ngan mga pitad ha pag-atiman han yamang-dagat ha ilarum han Fisheries Management Area o FMA.
Sumala kan BFAR-8 Information officer, Christine Gresola nga an panuyuan han monitoring in agud matudlok an sitwasyon han suplay ngan presyo han sardinas ha merkado, sugadman an paghatag hin regulasyon ha pangingisda ha mga parupangisda agud mapabilin an kadamo han sardinas ha kadagatan.
Dugang pa ni hini nga ha panahon han closed sardine season, in temporaryo nga gindidire an pangingisda ha mga lugar nga sakop hini, sugad nala ha 13 nga parte ha Southern Leyte nga aada ha ilarum han FMA 9, agud matagan hin higayon nga dumamo an mga sardinas.
Ha ilarum naman han Fisheries Management Area, ginburubligan han mga kaangayan nga ahensya ngan lokal nga gobyerno an pag-aatiman ha yamang-dagat, kadungan dinhi an pagpapatuman han mga regulasyon ha pangingisda ngan pagmonitor ha kabutangan han mga isda ha mga kadagatan nga sakop han rehiyon.
Samtang, ginmalatumat naman ni Gresola nga an ira pagpatuman han temporaryo nga restriksyon ha panguha han sardinas in agud mapabilin an kadamo hini ngan maproteheran an pakabuhi han mga parupangisda ngan masigurado an seguridad han pagkaon ha rehiyon.
