TACLOBAN CITY — Kaparte han livelihood program para ha mga Persons Deprived of Liberty (PDLs) ha Male Dormitory han Tacloban City Jail an paghimo hin mga parol kada tuig, nga naghahatag ha ira hin oportunidad nga makakwarta pinaagi han ira paghimo hin mga dekorasyon para ha kapaskuhan.
Sumala kan JCINSP Benedicto Ramirez, Jail Warden han Tacloban City Jail Male Dormitory, kada tuig ini nga ira gindudumara labi na kon nagtitikahirani na an Pasko. Ha pagkayana, may-ada hira ongoing nga order nga nagkantidad hin P35,000 tikang ha usa nga residente han Palo.
Ginpaangbit ni Ramirez nga nadepende ha disenyo, tema ngan mga materyales nga gagamiton, pareho han mantle o tela, an proseso han paghimo han mga parol. Nadepende liwat ha kadamu han order an ihap han mga PDL nga magigin kaparte ha pag-ayad hini.
Dugang pa ni Ramirez, an kita tikang ha livelihood program in iginhahatag ha mga PDL nga kaparte ha paghimo han mga parol. Samtang, kun an kapital in tikang ha suporta han City Government, gin-iiban anay an mga gastos ngan pondo para ha mobilisasyon ugsa ihatag ha mga PDL an nabilin nga kita. Pero, kun an mga PDL mismo an naggasto han kapital, direkta mahihingadto ha ira an kita.
Agud malikyan nga masayang an materyales, kapital ngan paniguro han mga PDL, ginhihimo an mga parol basar ha aktuwal nga mga order. Samtang, pinaagi hini nga livelihood program, natatagan an mga PDL hin higayon nga magkamay-ada kita pinaagi han ira mga abilidad samtang nagigin kaparte hira ha produktibo nga mga buruhaton ha sulod han pasilidad.
