Posible umabot ha 6.2 tubtob 7.4 porsyento an inflation rate ha nasud yana nga bulan, sumala kan Eugene Tan, Regional Governor han Philippine Chamber of Commerce and Industry (PCCI).
Sumala kan Tan, mas hitaas ini kumpara ha akseptado nga inflation threshold nga 2 tubtob 4 porsyento, nga nagpapakita han presente nga kahimtang han ekonomiya. Damo gihapon nga mga negosyante an nagpapahayag online han ira kakurian tungod han kamahinay han negosyo, samtang nagpapadayon an paghitaas han operational cost, presyo han fuel ngan iba pa nga mga gastuson.
Dako gihapon an posibilidad nga maaapektuhan an inflation kon maigo an sektor han agrikultura ngan pagkaon, labi na kon sumaka an presyo han bugas. Sumala kan Tan, an paghamubo han inflation ha naglabay nga mga bulan in nakabulig an pag-ubos han presyo han bugas, sanglit dako an magigin epekto ha inflation kon bumalik pagsaka an presyo hini, pati na an iba nga agricultural products nga apektado han El Niño.
Ha sektor naman han kuryente, partikular na ha Leyte Electric Cooperative II o LEYECO II, ginkikita liwat nga usa ini nga dako nga problema para ha mga panimalay ngan mga negosyante, kun diin an naglabay nga rate nga P9 kada kilowatt-hour in ha pagkayana umabot na ha P15 kada kilowatt-hour, samtang ha Samar naman in sobra P20 kada kilowatt-hour.
Tungod hini, nagpahimatngon hi Tan nga importante an pagmonitor han presyo han pagkaon, kuryente, fuel ngan transportasyon nga direkta nga nakakaapekto ha adlaw-adlaw nga panginabuhi.
