Nagpahimatngun an Tacloban City Hospital ha publiko nga yana nga mapaso iton panahon in hurak yana iton mga sakit nga dengue, diarrhea, food poisoning ngan heat-related illnesses nga kun diin, posible iton paghitaas han kaso han mga ini.
Sumala kan Tacloban City Hospital Chief, Dra. Gloria Fabrigas, nga labot la hini nga mga sakit in nahitaas gihapon iton mga naduduktan hiton mga influenza-like illnesses o mga sip-on, ubo ngan haranat ngan sugad man iton mga kaso hiton nagkakamayda hypertension ngan stroke.
Dugang pa hini, nga bug-os mangud nga season, magma-uran man o magmasirak in mayda mga sakit nga hurak ngan nakukuha hiton publiko kun diin, nagpahimatngun ini nga kinahanglan doble iton paghirot han mga molupyo labi na nga naabatan ha pagkayana iton El Nino.
Ginpahimatngun gihapon ni Dra. Fabrigan an publiko nga kun mahihimo in likayi an pagpapasirak labi na kun hataas na iton adlaw agud malikayan iton heat-related illnesses ngan sugadman dire basta matumar hin bisan ano nga over-the-counter nga medisina kun mayda sakit nga dire pa napapakonsulta ha health professional agud malikayan iton pagigin-immune lugod hiton sakit ha mga tambal.
