Gin-iimbestigahan na han emabahada han Pilipinas ha United Arab Emirates an usa nga report bahin han duha nga Pilipino nga naaresto ha Dubai mahitungod ha daw pagrecord ngan pagpakalat han mga ini hin video kasumpay ha naging pag-atake ha mao nga nasud.
Ha usa nga pahayag, gin malatumat han Philippine Embassy ha Abu Dhabi ngan Consulate General ha Dubai nga umaro na ini hin opisyal nga kumpirmasyon ngan impormasyon tikang ha mga otoridad han UAE han pangilal-an, kabutangan ngan presente nga legal na sitwasyon han duha nga Pilipino.
Sumala ha mga opisyal, gin rerespeto han Pilipinas an soberanya han UAE ngan pagpapatuman hini hin balaod kasumpay ha national security, cyberycrime, ngan public order kasunod han pagpapahinumdom han mga otoridad han UAE nga an pagpaangbit hin sayop o diri beripikado nga impormasyon nga may kalabutan ha seguridad, kaupod na an mga video ngan air defense interceptions, pag-atake ha mga landmark, magin AI-generated nga video in puydi igkunsidera nga krimen na may kaangayan nga sirot, pagkakapreso, ngan mabug-at nga multa.
Mahitungod hini, nanawagan an mga diplomatiko nga opisyal ha mga Pilipino ha UAE nga mag hirot ha ira mga aktibidad ha social media sugad man gin sagdunan gihapon an kumunidad nga likayan an pagkuha hin mga video, pag post ha internet o pagkomento ha mga diri kumpirmado nga iristuryahon kanit ha seguridad ha mao nga nasud ngan tumuod la ha mga opisyal nga pamahayag han gobyerno han UAE.
Samtang, sumala hiton mga nakuha nga report in kaupod an duha nga Pilipino ha 25 katawo nga daw na-aresto tungod ha pagpa-angbit hin video ha internet kasumpay ha mga nahinabo nga pag-atake ha nasud. Kaupod naman ha mga nadakop an pira nga mga langyawanon tikang ha India, Pakistan, ngan Bangladesh.
