TACLOBAN CITY– Dead on arrival an duha nga driver, mahuman nga aksidente nga magbunguay an mga ginmamanehuan hine nga motor ha Catarman Samar.
Ginkilala an mga ine kanda alyas Mark 26-anyos ngan residente han Catarman Samar, samtang an usa naman in hi alyas Rey 28- anyos ngan residente han Bicol Sorsogon City.
Sumala kan Cpt. Meann Erivera, Information Office, Northern Samar Police Provincial Office, nga subay ha ira imbestigasyon nagmamaniho an parehas driver hin opposite direction, ngan pag-abot ha lugar kun diin natabo an insidente, an ginmamanihuan nga motorsiklo ni alyas Rey in waray head light, ngan kumawat ine hin linya kun diin didto makakatapo niya an ginmamanihuan ni alyas Mark.
Nagresulta ine hin banga-ay han ira mga ginmamanihuan nga mga motor, kun diin nakag-angkon an mga driver hin maglain-lain nga samad ha ira lawas nga nagresulta han ira dayon nga kamatayon.
Kalakip gihapon nga nakag-angkon hin samad an backrider ni alyas Rey, ngan dayon ine nga gindara ha ospital agud nga tagan hin dayon nga medikasyon, ngan yana in nagpapaupay na ine.
