NATIONAL – Gin batikos ni Vice President Sara Duterte an desisyon han gobyerno han Pilipinas nga makigbinuligay ha International Criminal Court (ICC) kasumpay ha kaso ha iya tatay nga hi anay presidente Rodrigo Duterte.
Sumala ha Bise Presidente nga presente nga aadto ha The Hague, Netherlands para bisitahon an anay Presidente ha iya detention facility ha ICC, nga kinahanglan nga igprayoridad han gobyerno an seguridad han mga Pilipino nga naiipit ha Israel ngan Iran.
Nakakasubo daw gihapon nga mahibaruan nga gagamiton han gobyerno an pondo han nasud para ha mga testigos kontra ha iya tatay imbes nga gamiton an kwarta para buligan an mga kababayan nga Pilipino nga naiipit ha kasamok ha Israel ngan Iran.
Utro gihapon nga nagpabati an Bise Presidente ha gobyerno nga puros pulitika la ngan pagpakaraot an prayoridad, ngan dire an mga residente nga Pilipino.
Pero syahan na nga gin klaro han Malakanyang nga an pagbulig han gobyerno ha mga testigo kontra ha kaso han anay Presidente ha ICC in dire direkta nga pakikigbinuligay ha International Tribunal kundi pagbulig ha igkasi Pilipino.
