TACLOBAN CITY – Ginpahayag han Traffic Operations Management Enforcement and Control Office (TOMECO) nga tigda nga nagdamo an volume han mga sarakyan nga nasulod-gawas ha syudad han Tacloban kadungan han pagtitikang han klase.
Sumala kan Jobz Lagutan, head han TOMECO Engineering and Facilities Division, nagkabugiot an mga sarakyan labi na ha mga dalan ha dapit han mga eskwelahan ha syudad.
Malinampuson naman nira nga nasurapo an mao nga pagbugiot han dalagan han trapiko ha syudad.
Ginlalauman naman nira nga magpapadayon ini nga sitwasyon labi na nga magkadurungan an oras han pagsusulod han mga estudyante ngan mga empleyado.
Ginsisiguro naman han mao nga opisyal nga permanente nga nakaandam ngan nakaalerto an ira mga personnel agud nga maging hapsay an dalagan han trapiko ha syudad yana nga nagtikang na an face to face classes han mga estudyante.
