NATIONAL–Posible nga maka-abat hin parupadayon nga pag-uran an pira nga lugar ha Visayas ngan Southern Luzeon mahitungod ha epekto han Tropical Cyclone Ada.
An mga nasabi nga pag-uran, sumala ha state weather bureau, in posible nga mag-iha kutob ha kataposan han semana.
Yana nga adlaw, ika-15 han Enero, posible nga maka-abat hin 50-100mm nga pag-uran an mga probinsya han Northern Samar, Eastern Samar, Leyte, Southern Leyte, Dinagat Islands, Surigao del norte, ngan Surigao del Sur.
Buwas naman, ika 16 han Enero, posible nga mas makusog nga pag-uran an ma-aabat ha mga probinsya han Catanduanes, Northern Samar, ngan Eastern Samar.
An mga nasabi nga lugar in ginlalaoman nga makaka-eksperytensya hin 100-200mm hin uran.
Makaka-abat naman hin 50-100mm nga uran an mga probinsya han Camarines Sur, Albay, Sorsogon, Samar, Biliran, Leyte, Southern Leyte, Dinagat Islands, ngan Surigao del Norte.
Ha Sabado naman, ika 17 han Enero, utro nga mabuhos an 100-200mm hiton uran ha mga probinsya han Catanduanes, Camarines Sur, Albay, Sorsogon, ngan Northern Samar, samtang, makaka-abat naman hin 50-100mm hin uran an mga probinsya han Camarines Norte, Masbate, Eastern Samar, Samar, at Biliran.
Sumala ha weather bureau, hitaas an tsansa hin pagbaha ha mga habubo nga lugar ngan posible nga landslide.
Posible gihapon nga humitaas an bolyo han uran samtang tipahirani an Bagyong Ada ha katunaan han nasud.
