VILLABA, LEYTE – Doble an paningkamot han mga kapulisan han Villaba, Leyte agud mapug-ngan an mga untoward incidents yana nga tikaharani na an piniliay.
Sumala kan Villaba Municipal Police Station Chief of Police, MAJ. Ian Salvador Po nga bisan man mayda nira nakakarawat nga report hiton panmumusil in dayon nira nga natutudlok an mga suspek ngan napapasakahan hin kaso mahitungod ha ira pakikipagsumpayan ha komunidad ngan ha mga Crime Scene Operatives.
Ha pagkayana in nag-install na hira hin 4 nga CCTVs ha mga checkpoints ha Villaba agud nga matudlok nira kun hin-o iton mga nagawas o nasulod ha lugar ngan kun hin-o iton pangilal-an han mga magpruprubar nga maghimo hin kasamok.
Sumala pa kan Po, nga labot la ha mga CCTVs in mahugot gihapon nga nagbabantay ngan nagpapatrolya iton ira mga kapulisan agud masigurado nga mapupugngan ngan malilikayan iton mga insidente labi na gihapon nga hirani na iton kapatronan ha Villaba.
Ginpaangbit naman hini nga ha luyo han ira mahugot nga pagbabantay in danay nalulusotan hira hiton mga suspek pero dayon naman an mga ini nai-identipika ngan napapasakahan hin kaso mahitungod liwat ha mga nagpakadeploy nga mga force multipliers ha bug-os nga 3rd District han Leyte.
Dugang pa han opisyal nga posible gihapon nga madugngan iton mga kapulisan nga igpapandeploy ha lugar pira ka-adlaw ugsa iton piniliay.
Manunumduman nga usa an Villaba, Leyte nga natudlok han mga kapulisan kumo election hotspots kun diin, masukot iton mga insidente hiton mga panmumusil ngan krimen hiunong hiton eleksyon.
