NEVADA, LAS VEGAS – Utro nga nagin urusturyahon an kakaiba nga dining experience ha Heart Attack Grill, usa nga burger restaurant ha Nevada, Las Vegas, mahuman an mga insidente nga nagdurot hin magkadurudilain nga reaksyon ha publiko ngan mga eksperto ha panlawas.
Kilala an Heart Attack Grill nga nagsi-sirbe hin mga pagkaon nga may hataas nga calories ngan ha kontrobersyal hini nga tema nga ginhihimo nga “libangan” an konsepto han sakit ha kasing-kasing.
Nahipatik nga pira nga mga customer na an nag kinahanglan hin atensyon medikal samtang, nakaon ha mao nga restaurant. May nareport nga mayda usa nga costumer nga tigda nala gin-atake an kasing-kasing samtang nakaon.
Dire na bag-o an sugad nga insidente ha mao nga etablisyimento, ngan maiha na nga ginkokondena ngan ginkwe-kwestiyon ini mahitungod nga an branding hini in nakasentro ha mga terminolohiya nga medikal.
An ira menu in may ngaran sugad han “Bypass Burger”ngan “Flatliner Fries”, nga mayda sobra-sobra nga calories, samtang an mga staff in nakasul-ot kumo mga nurse, usa nga konsepto nga may panuyuan maghatag hin kakaiba nga experience pero gintutudlok han iba nga “sensitibo.”
Ha kaluyo han mga kontrobersya, gindudumog lagihapon an restaurant han mga turista. Usa mangud ha mga “promosyon” han establisyemento an paghatag hini hin libre nga pagkaon para ha mga tawo nga may timbang nga sobra 350 pounds nga duro nga ginkokondina han mga health advocates.
Samtang, duon naman han management han restaurant nga an ira konsepto in kaparte han “satirical entertainment” ngan responsibilidad la gihapon han kada indibidwal an ira panlawas.
