TACLOBAN CITY– Ginpailarom ha State of Calamity an bug-os nga probinsya han Villaba Leyte, matungod ine ha natabo nga rockslide nga nahipatik ha pira nga mga lugar han nasabi nga probinsya.
Kanit ine ha natabo nga makusog nga linog nga umigo ha Cebu City han nakalabay nga bulan.
Sumala kan Villaba Leyte, Municipal Relations Officer, Teddy Vapor, maabot ha 187 nga pamilya an gin forced evacuate ha Barangay Tagbubunga, han mao nga probinsya.
Ginpaangbit pa ni Vapor, nga ugsa hira magpatuman hin forced evacuation nag-aro anay hira hin bulig ha Mines and Geosciences Bureau (MGB), ngan Philippine Institute of Volcanology and Seismology (PHILVOLCS), agud nga mapanginano an sitwasyon.
Mababaruan nga an kadam-an nga mga bukid partikular na ha barangay Tagbubunga in puros mga bato, ngan delikado ine ha katalwasan hiton publiko.
Ha pagkayana, nagpapabilin an mga residente han Barangay Tagbubunga ha covered court, samtang an iba naman in aadto ha mga elementary school han nasabi nga barangay.
Ginsigurado naman han nasabi nga opisyal, nga aasisteran nira an mga residente ha mga panginahanglan hine, kun diin nag-alutaga hira hin P1M nga inisyal nga budget para hiton relief goods nga igpapanhatag ha mga apektado nga evacuees.
Naghatag na gihapon hin pauna nga bulig nga relief items an buhatan hiton Department of Social Welfare and Development (DSWD).
Ginmalatumat ni Vapor, nga nagbubug-os hira yana hin desisyon nga matagan hin relokasyon an mga nag-uukoy ha mga delikado nga lugar han ira probinsya.
Ginbabana-bana naman nga maabot ha P1.8M iton ira ig-aalutaga nga kantidad para ha pagpalit hiton tuna nga babalhinan han mga resdente.
