TACLOBAN CITY – Patay an usa nga kagawad samtang usa an samaran mahuman an panmumusil han usa nga lalaki ha sayawan tungod hitun kahubugan ha Brgy. Santa Cruz, Matuginao, Samar.
Ginkilala an mga biktima kan Nilo Tolin, 51 anyos an pangidaron, Brgy. Kagawad ngan hi Arnel Velarde, 20 anyos, single, parag-uma ngan residente han Brgy. Carolina Matuginao, Samar.
Ginkilala naman an suspek kan Daison Tagana, 35 anyos an pangindaron, construction worker ngan residente han Brgy. San Isidro Matuginao Samar.
Sumala kan PCapt. Orlando Canada Chief of Police hitun Matuginao Municipal Police Station, nakadto ha sayawan an suspek ngan tigda nala ine nanmusil.
Naigo ha bungkog hi Tolin samtang lumahos naman an bala han pusil ngadto han usa nga biktima nga hi Velarde.
Dead on the spot hi Tolin samtang padayon liwat nagpapaupay hi Velarde mahuman dad-on ha Calbayog District Hospital.
Waray naman delito an suspek ngan mga biktima kundi dara la han duro nga kahubugan han suspek an nagin rason han mao nga panmumusil.
Padayon nga nagdudumara hin hot pursuit operations an mga kapulisan agud madakop an kumalagiw nga suspek.
