VILLABA, LEYTE – Harayo na ha karat-an an duha nga biktima han panmusil ha Brgy. Buga-Buga, Villaba, Leyte dida han nakalabay nga Martes, Setyembre 9.
Ginkilala an mga biktima kanda alyas Gerlie, 21-anyos, ngan alyas Eddie Boy, 37-anyos, mag-live partner, ngan mga residente han Brgy. Cobado, Maasin City.
Sumala kan Villaba Municipal Police Station Chief of Police, PMaj Ian Salvador Po, nag-angkon hin igo harani ha kasing-kasing an biktima nga babaye, samtang utod naman an usa nga tudlo han lalaki nga biktima mahuman nga mapuruhan han igo.
Manunumduman nga ginpamusil an mga biktima ha lugar han insidente samtang tipabalik an mga ine ha Ormoc City mahuman nga waray makasakay ha ferry boat nga tipakadto ha Kalanggaman Island.
Kun diin pag-abot han mga biktima ha lugar han insidente in ginbantayan hira han mga suspek ngan gin paarakan hin bala hin pusil, nga nagresulta han kaigo han mga ine.
Ha kaluyo han naangkon nga igo in nahimo pa han mga biktima nga maka-drive pahirayo ha killing zone hasta nga umabot an mga ine ha Brgy. Hibulangan, Villaba, Leyte ngan amu pala an paka-pangaro hin bulig.
Ha pagkayana in natudlok na mga suspek han insidente ngan papasakahan na hin criminal case.
Samtang, personal nga kasinahon naman an ginkikita nga motibo han pamusil han mga suspek ha mga biktima.
