Waray pa kasiguraduhan kun san-o mahuhuman an kaso ni anay presidente Rodrigo Duterte ha International Criminal Court (ICC) ha The Hague, Netherlands.
Igin eksplikar ni Atty. Kaiser Cordero, usa nga international lawyer, nga ha ilarom han Article 61 han Rome Statute, mayda tulo nga pwede mahitabo ha paghuhuman han iya confirmation of charges hearing yana nga adlaw.
Syahan, pwede ig confirm han Pre-Trial Chamber an charges, ngan ha oras nga mahitabo ini, in titikangan na an kaso ha Trial Chamber, kun diin, dinhi na mahibabaruan kun ‘guilty beyond reasonable doubt’ hi Duterte.
Ikaduha, pwede nga dire ig confirm an charges, ngan mababasura an kaso ngan makakauli ha nasud an anay presidente.
Pero, mayda pa ikatulo nga opsyon an ICC nga pwede mag-adjourn ngan tagan hin higayon an prosekusyon nga maghatag hin kadugangan nga ebidensya.
Karuyag sidngon, pwede hira bumalik ngan mag-‘take-two’ dara an magkusog nga kaso.
Mahitungod hini, dire pa pwede makagawas hi Duterte, dire kaparehas han iba nga kaso nga kun kulang ha ebidensya in dismissed dayun, pero ha ICC, may higayon pa an prosekusyon nga aydon ngan pakusgon an ira kaso.
An ginkikita, ha gindudumara ha Pre-Trial Chamber yana in kun mayda “substantial grounds to believe” nga mayda krimen ngan may partisipasyon an akusado.
Pero dire pa ini an final judgment nga guilty o acquittal.
