INTERNATIONAL – Naghatag hin suhestyon hi US President Donald Trump nga kinahanglan nga pareho maghatag hin parte han teritoryo o tuna an Ukraine ngan Russia agud ma-undang na an sobra 3 ka-tuig nga giyera.
Kasumpay hini, ginlala-oman han presidente nga makikighimangraw ha iya hi Russian President Vladimir Putin ha Alaska yana nga ti-arabot nga Biyernes, Agosto 15.
Samtang, nababaraka naman an mga lider han Europa ngan hi Ukrainian President Volodymyr Zelensky nga posible igduso han Estados Unidos an usa nga kasabotan nga magdudurot hin danyos ha Ukraine.
Ini in mahitungod mnga bisan naghatag na an Amerika hin kadugangan nga armas ha Ukraine ngan nagpatuman hin taripa ha lana han Russia, diri la gihapon klaro kun ano an aktwal nga iginduduso ni Trump kabahin ha balyu-ay hin teritoryo.
Ha kaluyo nga bahin, magkakaada hin paghimangraw an mga lider han Europa yana nga semana agud maghimo hin usa nga polisiya antes an pagkikita nira Trump ngan Putin.
